سوداني نت:
من كرامات بيوت العزاء والافراح السودانية غير المواساة والمشاركة والمساهمة والتسرية، يظل الانتباه لتعليقات الجوار في الخيمة والمناضد والكراسي مدخلا معرفيا لإلتقاط الواقع السياسي والاقتصادي والاجتماعي و كل أذن حصيفة منتبهة يمكن أن تلتقط حزمة من العناوين التي تصلح لإصدار أكثر من صحيفة. وعلى طريقة تدريب البواكير في العمل الإعلامي ظللت ألتقط مجموعة من العناوين من خيمة العزاء الامدرماني دون أن ألفت انتباه الاخرين إلى أنني اسجل ملاحظاتهم وتعليقاتهم الساخرة الساحرة، فاليك عزيزي القارئ هذه المجموعة من العناوين والتي يمكن أن تتطور إلى مقالات ودعوات للنقاش والتي تصلح للتدبر وحتى الحلول.
1- أنت عارف يا ود بانقا الوباء ده لو جانا في السودان مابيقيف على كرونا ، ده ببقى كرونا وكرولا وكريسيدا وكامري.
2- يا جماعة والله السعودية دي شايلة معانا التقيلة ولذلك إن احسنت تستحق الثناء وإن قصرت تستاهل الصمت الكريم رغم اني متأكد إنو حاشاها من التقصير، فرد عليه أحدهم: إنت يا كرار ماك ضايق خيرها فرد عليه بصوت صاخب وغاضب: كلكم ضايقين خيرها.. الخزانة مسحت الشوارب والحجر الاسعد مسح الذنوب.
3- كدي ألفتو لي أحمد الانصاري ده.. عندي معاهو كلمة (أنا شايف يا أحمد إنو الشيوعيين والبعثيين شالوا نوار الخدمة المدنية .إن شاء الله سيدك ما مرقنا بي قد القفة؟
4- سمعت قالوا ضياء السوداني قال يحجزوا جوازات الوزراء الاجانب ديل.. والله ليهو حق..كلنا خايفين كان الكوع حمي يقوموا صوف.
5- الازمات في زمن البشير كانت عترة بتصلح المشية اليومين ديل بقت نكتة بتصلح الحكي . انا نفسي أبدا بالهتاف المعروف (إستقيل ياثقيل) لكن بصراحة الثقلاء بقوا كتار، وده معناهو دمي بتفرق بين القبائل.
6- نمرة الدولار زمان كانت 11خ/ هسة بقت111 خ/ت على وزن قحت التي اصبحت قحط .
7- ود سعيد يعقوب عافي منو بقى الطفل المعجزة . وكيل أول ومدير عام وناطق رسمي وتمكيني وعضو لجنة مركزية وسفير وراجل سفيرة وسوداني وفرنساوي.
8- ات يا ادروب الشرق بقى كيف؟ اجاب بطريقة الشرقاوي البليغ بورتسودان كانت سفينة لمساكين بالبحر ويا ابراهيم اخوي ما انت عارف الحالة بقت القعدة في قضروف سعد ملاله! اما كسلا اصبح الغاز والطوابين صرعى والكوانين بتن في اطراق!
9- نحن في زمان اصبحت فيه الرغيفة قطعة زلابية واصبحت الزلابية حبة بليلة والشاطر يكمل المنظومة!!
10- سمعت قبل أسبوع من ثقة إنو مجموعة الضباط المحالين للمعاش وصلوا 400إنت يا الطاهر الجيش ده فيهو كم ضابط ؟
11- إنت القحاتة ديل كان ما لقو ليهم فنان وأناشيد بنات ناس ما يشغلوا اناشيد مايو الاولى:
يا فارسنا ويا حارسنا ..يا بيتنا ومدارسنا.
كنا زمن نفتش ليك جيتنا الليلة كايسنا!
هم قايلين بيلقوا أحسن من حمدوك ده ؟ الراجل ولدهم وتربية إيدهم!
12- يا جماعة الخير إنتو ود عباس مدني ده عفيناهو من الصفوف سوا لينا شنوا في الواحد وعشرين يوم؟؟
13- بتي شاهيناز السنة دي ماشة الروضة قمت حفظتها عشرة من قصار السور قامت أختها الكبيرة قالت ليها اوعك .. القراي بجلدك!
14- إنت الجماعة ديل كان مالاقين حل لعشة وأسماء اخير يدوهم إمتياز المعاش قبال يجي الرشاش.
15- البارح يا دقلاشي سمعت اخر روائع سامي صولة.. وحفظت المقطع الاول:
ممشوقة زي طاولة رغيف
ومزدانة بالفول النضيف
وزي بوش مظبط من حريف
لو حافلة الحظ الوريف
شالتني بالوعد الشريف
كنت غنيت للسيادي
وهتفت للقصر المنيف!
16- بصراحة يا السر البلد واقفة فرد ابراهيم المو بطريقته اللاذعة واقفة بت القبايل دي! دي مهرولة صوب الهاوية يا مثالي.
17- تعرف اخطر مافي سد النهضة لما تغرق الخرطوم اديس ابابا بتكون مستمتعة باخر نسخة من التايتنك!
18- أما ألطف ما قيل في بيت العزاء فكانت الموعظة الدرامية الاتية لمولانا عثمان المنا:
حيث قال عارفين يا جماعة انو الدكتور محمد يوسف مصطفى ده ، والده يوسف مصطفى عقد في صراصر بالشريعة ، وسموه محمد خير الاسماء بالشريعة وعملوا السماية (العقيقة) بالشريعة ، وختنوه بالشريعة وحفظ جزء عم في خلوة صراصر بالشريعة وعرسو ليهو بت شيخ الامين محمد الامين بالشريعة وولد اولاده وبناتو بالشريعة وعرس ليهم بالشريعة بقى شيوعي وإحتمل أهل صراصر شيوعيته بالشريعة (لَا إِكْرَاهَ فِي الدِّينِ) وعفا السودانيون خيانته الوطنية وإلتحاقه بالمتمردين يالشريعة ( قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ) وعينه البشير وزيرا وفاء للعقود بالشريعة، وعاد للجامعة استاذا وفاء للعدالة وتكافؤ الفرص بالشريعة، وبعد عمر طويل فإن تلقينه الشهادة وغسله و تكفينه و الصلاة عليه ودفنه وتقسيم ورثته سيكون وفقا للشريعة ، وهذا يؤكد ان الدين (موجود) في كل تفاصيل حياة محمد يوسف غير أن هذا لا ينفي ان عقل الدكتور غير موجود!
إضغط هنا للإنضمام إلى مجموعتنا على الواتساب
إضغط هنا للإنضمام إلى مجموعتنا على الواتساب (٢)
إضغط هنا للإنضمام إلى مجموعتنا على الواتساب (٣)
إضغط هنا للإنضمام إلى مجموعتنا على الواتساب (٤)
إضغط هنا للإنضمام إلى مجموعتنا على الواتساب (٥)
إضغط هنا للإنضمام إلى مجموعتنا على الواتساب (٦)
إضغط هنا للإنضمام إلى مجموعتنا على الواتساب (٧)
إضغط هنا للإنضمام إلى مجموعتنا على الواتساب (٨)
إضغط هنا للإنضمام إلى مجموعتنا على الواتساب (٩)
إضغط هنا للإنضمام إلى قناتنا على التليغرام
