رسالة لمريم الصادق تُثير سُخْريّة رُوّاد مواقِع التّواصُل الإجْتماعي

أثارت رسالة لمريم الصادق المهدي تم تداولها بشكل واسع مساء أمس الخميس، سخرية رُوّاد مواقِع التّواصُل الإجْتماعي من “مريم” التي قالت في رسالتها نصّاً:

“قسما بالله الذي لا اله الا هو؛ لا أنس لا جان بيمنعنا عن وطننا السودان.
وانني على الموعد غدا الساعة الخامسة عصرا في مطار عاصمة بلادي التي حررها اهلي بجهدهم وجهادهم ورسموا حدودها بدمائهم. والتي أتى باستقلالها كاملا حزبنا”

وجاءت بعْض تغريدات وبوستات رُوّاد مواقِع التّواصُل الإجْتماعي ردّاً على رسالة “مريم” والتي رصدها موْقِع “سوداني نت” على النّحْو التّالي:

(عمرنا ما حنطلع من حيز العصبية الضيق دا لبراح القومية الأشمل ومن يفترض إنهم معارضين للنظام خطابهم لسة في أهلي وحزبنا ..

أنا مع حقوقها بالتأكيد لكن ضد العقلية دي)

(نفس الملاحظات
لكن اجمالا ده اسلوبها و طريقة تعاملها و دي حاجة مزعجة جدا)

(فعلا والله حنضحك حنعمل شنو كان ديل ساستنا الله يقطعهم)

(ايتو جنس غايتو…هو في غيرهم الضيع السودان منو..عمالة وخمخمة خيرات البلد من زمن جدهم التقول البلد مكتوبة في اسمهم.قالت حررناها..)

(طريقة مخاطبتها للناس تدل على نرجسية و استعلاء واضحين، و ربما تكون مصدقة فعلا ان أهلها هم من حرر الوطن الذي هم اسياده، هل نستبدل سيدا بسيد؟)

(لا زلت عند رأيي من سنوات طويلة .. مفروض نعارض الأحزاب الطائفية المتعصبة دي بنفس قدر معارضتنا للإنقاذ ..)

(اسوء من الحكومه ابتلانا الله بمعارضه موروثه جاهله اهليه متغطرسه)

( صدقت والله نلقاها من منو ولا منوعدو واضح خير من حليف متغطرس ومجهجه)

(ههههههههههههههههههههههههههههههههه المملكة العربية المهدوية)

(شايلة سيف ودرقة ولا أنا ماشايفة كويس)
(من منا لايذكر حملة ود سعد علي اهل شندي..واستباحتهم للمدينه وهمحيتهم وتفعالهم القذره المشينه..التي اجبرت حرائر الجعليين علي القفذ في النيل وتفضيل الموت علي اهانة شرفهن وكرامتهن وعزتهن!!
من أسوأ ممارسات المهديه والمسمي الخليفه عبدالله….
ولازالت مساوئ وفواجع و كوارث المهديه من الاشياء المسكوت عنها.. وبجب ان تخرج الي العلن ويشرح تاريخ المهديه السيئ حتي يعلمه جميع الناس…وعلي لسلطات ان تفتح دار الوثائق للناس وتفرج عن الوثائق السريه عن فترة المهديه)

(ياتو أهل الحرروها ديل؟
دي ما عارفه العملوهو أهلها في السودان والخلى السودانين يستقبلوا كتشنر بالزغاريد لما جاء مسح بيهم الارض وحصدهم حصاد العيش؟)

(اهلها ياتم ؟ تقصد خليفة رسول الله النصب نفسه بنفسه ! ولا جهدية التعايشي الاحسن منهم الجنجويد الافسدو في العباد لحدي دخولهم التُكل وشرابهم العجين .. التاريخ وثيقه تختفي الى حين ولكنها لا تموت.)

(إنت قايل المصبرنا الغربة الطويلة دي شنو ما ياهو جنس الكلامات دي
الظاهر انحنا زاتنا كشونا مع المستعمر البركة في حبوبة إليزابيت اللمتنا عليها هسع كنّا مجهجهين لا عرفنا روحنا دون و لا بدون)

(طلعنا زينا وزي البدون بتاعين الكويت وااااحد..ياحليلنا)

(كلام الست مريم السيد الصادق السيد المهدي المنتظر دا كلام ما يمر فيكم ساي ..
الشفت فيكم دربو مرق قبال نتيجة اللوتري 
كلام الست مريم الخ الخ دا الشفت فيكم .. يطبعو في ورقو A4 ويمشي بيهو اقرب ممثلية او قنصلية او سفارة بتاعت يانكي ..
يفتح بيهو كيس طوالي من حتتو دي 
انتو بس قولو ليهم الست مريم قالت بنمسكة من الكبري والخ الخ .. يا حبذا كمان لو شلتو ليهم اغنية انا مالي مال الرز باللبن ومالي ومال القيرقان.. ياحبذا لو شلتوها لي القنصل في فلاش …)

(حيرتونا والله
انتو مفتكرين فكر الشعب السوداني ياهو الفكر القديم داك ايام الدراويش
كل شوية جاري لي بره بالطيارة وتعملو عيد ميلادكم بره وتلعبو القولف وتجو راجعين بالحصين والناس وراكم رافعين الاعلام والنوبة تدق وسعادتك تجي تشقي الصفوف راكبة الحصان انتم الملوك ونحن الرعية
صراحة حاجة بايخة وكترتوها شديد اترزعو اقعدو جوه ولا بره تعبتونا وتعبتو الحصين معاكم)

جدير بالذكر أن نائبة رئيس حزب الامة القومي “مريم الصادق” غادرت مساء أمس مطار هيثرو بالعاصمة البريطانية لندن متوجهة إلى العاصمة الخرطوم بعد غياب قرابة العام.